သွေးစကား




ကျော်သူ~

မြန်မာ့ ရုပ်ရှင် သမိုင်းတွင် ဦးနေဝင်း လက်ထက် (၁၉၆၂)ခုနှစ် မှစ၍ ပြည်ပနိုင်ငံများ မှ မြန်မာပြည် တွင်းသို့ လာရောက်၍ ရုပ်ရှင်ရိုက်ကူးခြင်းကို ပထမဦးဆုံး လာရောက်ရိုက်ကူးသော အဖွဲ့သည် ဂျပန်နိုင်ငံ ရှိ(သွေး) ရုပ်ရှင် ရိုက်ကူးရေးအဖွဲ့ ဖြစ်သည်။ ၂၀၀၀ ခုနှစ်ခန့်က ဂျပန်လူမျိုး ရုပ်ရှင်ဒါရိုက်တာကြီး မစ္စတာ ကိုဂျိချီနို (Koji Chino)နှင့်အဖွဲ့သည် မြန်မာပြည်ရှိ ဂျပန်-မြန်မာ ချစ်ကြည်ရေးအဖွဲ့ ခေါင်းဆောင် ဦးခင်မောင်စိုး တို့နှင့် ပူးပေါင်း၍ စာရေးဆရာမကြီး ဂျာနယ်ကျော်မမလေး ရေးသားထားသော ဂျပန်ခေတ် ဖြစ်ရပ်မှန် ဇာတ်လမ်းအား ရိုက်ကူးရန်အတွက် မြန်မာပြည်တွင် ပြည်တွင်းရှိ မြန်မာ့ရုပ်ရှင် အနုပညာ ရှင်များအား ယင်းဇာတ်ကား အတွက် အလိုက်ဖက်ဆုံး သရုပ်ဆောင်များအား လာရောက် လေ့လာမှုကို ပြုခဲ့ကြသည်။ 

ထိုသို့ ရုပ်ရှင်သရုပ်ဆောင် များအား လာရောက် ရွေးချယ်တွေ့ဆုံမှုများ ပြုလုပ်ခဲ့ရာ မြန်မာ့ရုပ်ရှင်လောကမှ သရုပ်ဆောင် များဖြစ်ကြသော မင်းမော်ကွန်း၊ ဦးအောင်လွင်၊ မျိုးသန္တာထွန်းနှင့် ကျော်သူတို့အား ရွေးချယ် ခဲ့ကာ ၂၀၀၁ ခုနှစ်တွင် မြန်မာပြည်တွင်းရှိ မန္တလေးမြို့တွင် စတင်ရိုက်ကူးမှုကို ပြုလုပ်ခဲ့သည်။ ထိုသို့ ရိုက်ကူးမှုပြုရာတွင် မြန်မာပြည်တွင် ပြည်ပမှ ပထမဦးဆုံး လာရောက် ရိုက်ကူးသော ရုပ်ရှင်ဇာတ်ကားကြီး 
ဖြစ်သည့်အတွက် အိမ်ရှင်မြန်မာပြည်သူ/သားများမှ အထူးဝမ်းသာအားရ ကြိုဆို၊ ပံ့ပိုး  ကူညီမှုများ ပြုလုပ် ခဲ့သော်လည်း အချို့သော ရိုက်ကူးရေးဆိုင်ရာ ကိစ္စရပ်များတွင် ဌာနဆိုင်ရာများ၏ အားနည်းချက်များ ကြုံတွေ့ခဲ့ရသည်။ 

 ထို့အပြင် ထိုစဉ်အခါက မြန်မာကျပ်ငွေဖြင့် ကုန်ကျစရိတ်အား ရှင်းပေးသင့်သော်လည်း အချို့သော ကိစ္စရပ်များတွင် အမေရိကန် ဒေါ်လာဖြင့်သာ ရှင်းလင်း ပေးရမှုများအား မလိုလားအပ်ဘဲ ကုန်ကျစရိတ်များ များပြားခဲ့ရမှုကို ဂျပန်နိုင်ငံ (သွေး) ရုပ်ရှင် ဒါရိုက်တာကြီး ကိုဂျိချီနို နှင့် အဖွဲ့သားများ ကြုံတွေ့ခဲ့ရသည်။ 

ထိုကဲ့သို့သော ဂျပန်-မြန်မာ ချစ်ကြည်ရေးအား ပျက်ပြယ်မှု ဖြစ်စေမည့် မလိုလားအပ်သော အဟန့်အတား များ၊ အခက်အခဲများ၊ တောင်းဆိုမှုများ၊ ငွေကြေးပြဿနာ များကြောင့် ‘သွေး’ ရုပ်ရှင်ဇာတ်ကားသည် ရိုက်ကူးမှု အဆုံးမသတ်နိုင်မီ ဂျပန် ဒါရိုက်တာကြီး ချီနို နှင့် ဂျပန်ရုပ်ရှင်အဖွဲ့သားများ စိတ်မကောင်းခြင်း များစွာဖြင့် ဂျပန်နိုင်ငံသို့ ပြန်လည်ထွက်ခွာ သွားရတော့သည်။ 

 သို့ရာတွင် ဂျပန်လူမျိုးတို့၏ မလျော့သော ဇွဲလုံ့လတို့ဖြင့် ဒုတိယအကြိမ် သွေးကြွေးဆပ်ရန် မြန်မာနိုင်ငံ တွင်းသို့ ၂၀၀၃ ခုနှစ်တွင် ပြန်လည်၍ ဝင်ရောက်လာခဲ့သည်။ 


 ဌာနဆိုင်ရာများနှင့် ညှို့နှိုင်းမှုကို အကြိမ်ကြိမ် ပြုလုပ်ခဲ့ကာ ‘သွေး’ ရုပ်ရှင်ဇာတ်ကားကြီးအား အဆုံးသတ် ရိုက်ကူးမှုကို ပြုလုပ် နိုင်ခဲ့တော့သည်။ ၂ နှစ်တာ ကာလကြာမြင့် သွားမှုကြောင့် သရုပ်ဆောင်များ၏ ကိုယ်ခန္ဓာ အနေအထား၊ ဆံပင် အနေအထားများနှင့် ရိုက်လက်စ ဝတ်စားဆင်ယင်မှု အသုံးအဆောင် ပစ္စည်းများအား စနစ်တကျ တိကျမှန်ကန်မှုရှိရန် ဂျပန်ပညာရှင်များ အထောက်အကူဖြင့် အကောင်းဆုံး ဖန်တီးရိုက်ကူးနိုင်ခဲ့သည်။

 ထို ‘သွေး’ ရုပ်ရှင် ဇာတ်ကားကြီးအား ဂျပန်နိုင်ငံနှင့် နိုင်ငံတကာရုပ်ရှင်ပွဲတော်များတွင် ပြသခဲ့ရာ အထူး အားပေး အောင်မြင်မှုကို ခံယူခဲ့ရသော်လည်း မြန်မာပြည်တွင်း တွင်ပြသရန်အတွက် ယခုတိုင်  ပြသခွင့် မရသေးချေ။ 

ထို့ကြောင့် ယခု ၂၀၁၃ခုနှစ်တွင် (၁၀)နှစ်ကျော် နိုင်ငံတကာတွင် အားပေးချီးကျူးခြင်း ခံခဲ့ရသော သွေး ရုပ်ရှင်ဇာတ်ကားကြီးအား မြန်မာပြည်တွင် ပြသခွင့် ရရှိရန်အတွက် ဒါရိုက်တာ ချီနိုနှင့်အဖွဲ့သည် ဂျပန် -မြန်မာ ချစ်ကြည်ရေး ဥက္ကဌဖြစ်သူ ဦးခင်မောင်စိုး အကူအညီဖြင့် အစိုးရရုံးဆိုက်ရာ နေပြည်တော်မြို့ 
ပြည်ထောင်စု လွှတ်တော် သဘင်ခန်းမဆောင်တွင် လွှတ်တော် အမတ်များနှင့် အစိုးရအဖွဲ့ဝင်များအား လာရောက်ကာ ၃၀.၁.၂၀၁၃ ရက်နေ့၌ ပြသခဲ့သည်။ 


 အစိုးရ အဖွဲ့ဝင်များ၊ လွှတ်တော်အမတ်များ၏ အားပေးမှုကို ခံယူခဲ့ရသည်။ အချို့သော လူကြီးများ၏ မျက်ရည်စက်များ ကျဆင်းမှုကို တွေ့မြင်ခဲ့ရသည်ဟု ပြောကြားသံကိုလည်း ကြားသိခဲ့ရသည်။ ကျွန်တော် သည် ၂၉.၁.၂၀၁၃ ရက်နေ့၌ မလေးရှားနိုင်ငံတွင် လူမှုရေးလုပ်ငန်းရပ်များနှင့် ပတ်သက်၍ သွားရောက် ကာ မြန်မာလူမှုရေးအဖွဲ့ဝင်များ၊ မလေးရှားနိုင်ငံရောက် မြန်မာလုပ်သား လူငယ်များ၊ မလေးရှားနိုင်ငံရောက် ဆရာတော်/သံဃာတော်များနှင့် ရင်းနှီးနွေးထွေးစွာ တွေ့ဆုံအားပေး စကားဝိုင်းများ ပြုလုပ်ခဲ့ပြီး ရန်ကုန်မြို့  သို့ ပြန်လည်ရောက်ရှိခဲ့ကာ ပင်ပန်းနွမ်းနယ်မှုနှင့် နာရေးကူညီမှုအသင်း(ရန်ကုန်)၏ လုပ်ဆောင်ရမည့် လူမှုရေးလုပ်ငန်းများအား ခရီးမှပြန်လည်ရောက်ရောက်ချင်း လုပ်ကိုင်နေရ၍ နေပြည်တော်မြို့  
ပြည်ထောင်စုလွှတ်တော် သဘင်ခန်းမဆောင်တွင် ပြသခဲ့သော သွေး ဇာတ်ကားအား သွားရောက် အားပေးခြင်းကို မပြုလုပ်နိုင်ခဲ့ချေ။ 


  ‘သွေး’ ဇာတ်ကား ရိုက်ကူးရာတွင် မြန်မာ့ရုပ်ရှင်လောက အတွက် ရိုက်ကူးမှု၊ စီမံခန့်ခွဲ့မှု၊ စက်မှုပိုင်း၊ မိတ်ကပ်ပညာရပ်ပိုင်း စသည့် လက်တွေ့လုပ်ဆောင်ရသော ကမ္ဘာ့အဆင့်မှီ ရုပ်ရှင် ပညာရပ်များအား အသိဥာဏ်ပွင့်လင်း စေခဲ့သည်။ 

ကျွန်တော်သည် ‘သွေး’ ရုပ်ရှင် ရိုက်ကူးမှု မစမှီ ကာလများမှ ရုပ်ရှင် ဒါရိုက်တာအဖြစ် မြန်မာ့ရုပ်ရှင်များအား ရိုက်ကူးခဲ့ပါသော်ငြားလည်း ဒါရိုက်တာ အကယ်ဒမီဆုကို မရရှိခဲ့ပါ။ ဂျပန်ဒါရိုက်တာ ချီနို ရိုက်ကူးခဲ့သော ‘သွေး’ ဇာတ်ကား၏ အတွေ့အကြုံ ဗဟုသုတများအား မှတ်ယူလေ့လာ ခဲ့ကာ ၂၀၀၄ ခုနှစ်ခန့်က ကျွန်တော် ကိုယ်တိုင် ဒါရိုက်တာအဖြစ် ရိုက်ကူးခဲ့သော အမေ့နို့ဖိုး ရုပ်ရှင်ဇာတ်ကားသည် ဒါရိုက်တာ အကယ်ဒမီဆုကို ဆွတ်ခူး ရယူနိုင်ခဲ့သလို အမေ့နို့ဖိုး ဇာတ်ကားတွင် ပါဝင် သရုပ်ဆောင်ခဲ့သော အဓိက အမျိုးသမီး ဇာတ်ဆောင်၊ ဇာတ်ပို့၊ ဇာတ်ရံ၊ ဇာတ်ညွှန်း၊ ကုမ္ပဏီ၊ ကင်မရာ စသည့် ထူးချွန်ဆုပေါင်း (၇)ဆု အား ရယူနိုင်ခဲ့သည်။ ထို့ကြောင့် ဂျပန်ဒါရိုက်တာကြီး ချီနို ၏ကျေးဇူး၊ ဂျပန်-မြန်မာ ချစ်ကြည်ရေးအတွက် ရိုက်ကူးထားသော ‘သွေး’ ရုပ်ရှင်အဖွဲ့၏ ကျေးဇူး၊ ‘သွေး’ ရုပ်ရှင်ဇာတ်ကားကြီး၏ ကျေးဇူးတရားများသည် ကျွန်တော့်အတွက် များစွာ တန်ဖိုးရှိခဲ့သည်။


  ယခုကဲ့သို့ ကျွန်တော်၏ကျေးဇူးရှင် တစ်ဦးဖြစ်သူ ဂျပန်ဒါရိုက်တာကြီး ချီနိုနှင့် တတိယအကြိမ် တွေ့ဆုံခွင့် မရရှိခဲ့သည်ကို ကျွန်တော်များစွာ စိတ်မကောင်း ဖြစ်ခဲ့ရသော်လည်း ၂.၂.၂၀၁၃ ရက်နေ့ နံနက်(၉း၃၀) အချိန်တွင် သွေး ရုပ်ရှင် ဒါရိုက်တာကြီးချီနိုနှင့် အဖွဲ့အား ဦးခင်မောင်စိုးဦးဆောင်၍ နာရေးကူညီမှုအသင်း (ရန်ကုန်)ရှိရာ မြောက်ဒဂုံမြို့နယ်သို့ ဆိုက်ဆိုက်မြိုက်မြိုက်ကြီး ရောက်ရှိလာခဲ့သည်။ 

 သွေးမှ စကားပြော၍ ကျွန်တော့်ထံသို့ ရောက်ရှိလာသော ဒါရိုက်တာကြီး ချီနိုမှ ကျွန်တော့်အား ဝမ်းသာ အားရ နှုတ်ခွန်းဆက်ခဲ့ကာ ကျွန်တော်မှလည်း ဖက်လှဲတကင်းဖြင့် ကျွန်တော်တို့၏ လူမှုရေး လုပ်ဆောင် ချက်များ၊ သုခကုသိုလ်ဖြစ်ဆေးခန်း၏ ဆေးကုသမှုများအား လိုက်လံရှင်းလင်းပြသခဲ့ကာ ကျွန်တော်သည် ဧည့်သည်များနှင့် ဒါရိုက်တာကြီး ချီနိုအား နာရေးကူညီမှုအသင်း(ရန်ကုန်)၏ ပေးဆပ်မှု DVD အချပ်၊ ရက်စွဲမှတ်တမ်းစာအုပ်၊ လက်ကမ်းစာစောင်များနှင့် Kyaw Thu 2013 First Break Out Calendar တို့အား အမှတ်တရ လက်ဆောင်အဖြစ် ပေးအပ်ခဲ့သည်။ 

ဒါရိုက်တာကြီး ချီနိုမှ ကျွန်တော့်အား ယခုကဲ့သို့ လူမှုရေးလုပ်ငန်းများ လုပ်ဆောင် ပေးမှုများအား အထူး ဝမ်းသာဂုဏ်ယူပါကြောင်းနှင့် အပူသောကများ၏ ဖိစီးမှုများအား အနုပညာလုပ်ငန်းလုပ်ခြင်းဖြင့်   ပြန်လည် အစားထိုးစေလိုကြောင်း ကျွန်တော် မမျှော်လင့်ထားသော စကားအား ပြောကြားခဲ့သည်။

 ကျွန်တော်သည် ဒါရိုက်တာကြီး ချီနို ၏ ပုံပန်း ရုပ်သဏ္ဍန်အား ပြန်လည်၍ သတိပြုမိသောအခါ လွန်ခဲ့သော (၁၀)နှစ်ကျော် ခန့်က အသက်(၇၀) အရွယ်တွင် စတင်တွေ့ရှိခဲ့သော ပုံသဏ္ဍာန်နှင့် ယခုပြန် လည် တွေ့ရှိသော အသက် (၈၀)ကျော် အရွယ်၏ ပုံသဏ္ဍာန်သည် ကွာခြားမှု မရှိဘဲ ပိုမို၍နုပျိုသော သဏ္ဍာန်ကို တွေ့မြင် လိုက်ရသည်။ 

 ထို့ကြောင့် ကျွန်တော်၏ မနောစိတ်ထဲတွင် လွန်ဆွဲမှုတစ်ရပ် တဒင်္ဂလေးအတွင်း ဖြစ်ပေါ်ခဲ့ရသည်။ ယင်းမှာ “အနုပညာသမားများသည် အများသူငှာတို့ထက် ပိုမို၍ ရုပ်ဆင်းသဏ္ဍာန် နုပျိုစေပါသလား”နှင့် “အများပြည်သူတို့အတွက် အနစ်နာခံ ပေးဆပ်ရင်းဖြင့် မိမိ၏ ရုပ်ဆင်းသဏ္ဍာန် အိုမင်း စေပါသလား” ဟူသော လွန်ဆွဲမှုတစ်ရပ်ပင် ဖြစ်တော့သည်။

 ဒါရိုက်တာ ချီနို ၏ ဂရုဏာ တရားဖြင့် ပြောကြား လိုက်သော စကားအား တဒင်္ဂအတွင်း မိမိ၏ ဝဇီနှုတ်မှ “အများအတွက် ပေးဆပ်မှုများ ဖြစ်တဲ့ နာရေး၊ ကျန်းမာရေး၊ ပညာရေး၊ သဘာဝဘေး၊ စစ်ဘေး စတဲ့ အပူ မီးများကြောင့် ကျွန်တော် အနိစ္စတရားကို ကောင်းကောင်းကြီး သိသွားပြီ၊ ဒါ့ကြောင့် ပြင်ပ ရုပ်သဏ္ဍာန် ထက် အတွင်းနှလုံးသား လှဖို့ အရေးကြီးပါတယ်”ဟူ၍ ပြန်လည်၍ မေတ္တာစကားဆိုခဲ့သည်။ 

 မည်သို့ပင်ဖြစ်စေကာမှု ဂျပန်-မြန်မာ ချစ်ကြည်ရေးအတွက် အဓိကရိုက်ကူးခဲ့သော “သွေး”ရုပ်ရှင် ဇာတ် ကားကြီး၏ အဓိပတိဖြစ်သူ ဂျပန်ဒါရိုက်တာကြီး ချီနို ၏ ဇွဲလုံ့လ မလျော့သော “သွေး” နှင့် ကျွန်တော်  
ကျော်သူ ၏ ဗြဟ္မစိုရ် “သွေး” တို့သည် သွေးချင်း နှော၍ “ချစ်ကြည်ရေး၊ ငြိမ်းချမ်းရေးပြယုဂ်သွေး”အဖြစ် ရပ်တည်သွားနိုင်မည်ဟု ကျွန်တော်ကျော်သူ နှင့် ချီနို တို့ နှစ်ဦး အသိဆုံးပင် ဖြစ်တော့မည်။ 


0 Response to "သွေးစကား"

Post a Comment

မိတ်ဆွေရဲ့ ထင်မြင်ချက်လေးကို ရေးသွားနိုင်ပါတယ်
မိတ်ဆွေ၏ဝေဖန်မှု့သည်ရိုင်းစိုင်းမှု့များမပါလျှင်ဖော်ပြပေးသွားပါမည်

ကျွှန်တော်ဆိုဒ်နဲ့ပတ်သတ်ပြီး ဝေဖန်အကြံပြုချင်တာဘဲဖြစ်ဖြစ်တစ်ခုခုမေးမြန်းချင်တာဘဲဖြစ်ဖြစ် dmoethar@gmail.com ကိုအပ်ပြီးဝေဖန်အကြုံပြုမေးမြန်းနိုင်ပါတယ် ဆိုဒ်နဲ့တင်တဲ့ပိုစ့်တွေနဲ့ပတ်သတ်ပြီး အဆင်ပြေတယ်ဆို မိတ်ဆွေကတစ်ဆင့် သူများတွေကို ပြန်ပြောပြပေးပါ အဆင်မပြေရင် ကျွှန်တော်ကိုပြောပါ dmoethar@gmail.com ကိုအပ်ပြီး သိလိုသည်များကို
မေးမြန်းနိုင်ပါတယ်ဗျာ Admin~~ဒီမိုးသား(dmoethar@gmail.com)

Popular Posts

Facbook Like လုပ်ခဲ့ပါ

အလည်လာကြသူများ

Labels